جنگ،امن

الرسالہ کا شمارہ مئی ۱۹۹۱ "خلیج ڈائری" کے طور پر شائع ہوا تھا۔۲ فروری ۱۹۹۱ کو میں نے اپنی ڈائری میں جو صفحہ لکھا تھا ، اس میں یہ الفاظ تحریر کیے تھے : اس جنگ میں فتح کا تمغہ خواہ جس فریق کو ملے ، عام انسان کی مصیبتوں میں بے پناہ اضافہ ہو جائے گا۔ اور یہ مصیبتیں عالمی ہوں گی، حتی کہ ان مصیبتوں کا برا اثر اس ملک تک بھی پہنچ جائے گا جس نے جنگ کے بعد فتح کا تمغہ حاصل کیا ہے۔

اس تحریر کے ایک ماہ بعد جنگ بندی ہوئی تو واقعۃ ً ایساہی ہوا۔ چناں چہ جنگ ختم ہو گئی مگر مسائل ختم نہیں ہوئے۔ ٹائم میگزین (۱۵ اپریل ۱۹۹۱) نے اس کے بارے  میں تفصیلی رپورٹ شائع کی جس میں بتایا گیا ہے کہ خلیج میں فتح کے با وجود کس طرح نئے مسائل کا سامنا در پیش ہے۔ ٹائم نے لکھا ہے کہ امریکہ اور اس کے اتحادی اب ایک نئی مشکل سے دوچار ہو رہے ہیں :

America and its allies confront a new dilemma. (p.18)

 ٹائم کے مذکورہ شمارہ کو پڑھنے کے بعد ٹائم کے کچھ قارئین نے اس کو خطوط لکھے ہیں۔ یہ خطوط میگزین کے شمارہ ۶ مئی ۱۹۹۱ میں چھپے ہیں۔ ایک امریکی مکتوب نگار نے لکھا ہے کہ ایسا معلوم ہوتا ہے کہ صدربش نے خلیج میں لڑائی جیت لی مگر وہ جنگ کو ہار گئے۔

It looks like Bush has won the battle. . .

and lost the war in the Gulf.

(Lloyd Ringuist, Marshfield, Wisconsin)

 لڑائی صرف تخریب بر پا کرتی ہے ، وہ تعمیر کا واقعہ ظہور میں نہیں لاسکتی۔ لڑائی میدان جنگ میں جیتی جاسکتی ہے، مگر میدان جنگ کے باہر حقیقی زندگی میں وہ فتح کی خوشی نہیں دیتی۔ اس کے با وجود کیوں لوگ لڑائی کی طرف دوڑتے ہیں اس کی وجہ یہ ہے کہ لڑائی لوگوں کو بڑی چیز معلوم ہوتی ہے۔ حالانکہ با عتبار حقیقت امن بڑی چیز ہے اور جنگ چھوٹی چیز۔ اگر لوگ اس حقیقت کو جان لیں تو ہر آدمی پر امن تعمیر کی طرف دوڑے ، اور جنگ کا میدان ہمیشہ کے لیے انسانوں سے خالی ہو جائے۔

جنگ ہیرو ازم ہے ، مگر جنگ کا کوئی مثبت نتیجہ نہیں۔ امن بظاہر زیر و ازم ہے، مگر تمام بہترین کامیابیاں ہمیشہ امن ہی کے ذریعہ سے حاصل ہوتی ہیں۔